牛奶妹嘅嗜好

好多女仔細個都鍾意攬住毛公仔瞓, 原來Milky都係一樣!!!!

攬住繩繩瞓先.......

轉位瞓都仲要攬到實!

有時會好貪心, 一隻狗攬兩件玩具瞓覺!

Milky: 骨骨係我架, 哥哥你唔好搶我架!

今日放榜啦-真係等到頸都長!!!!

真係當年中五放榜都無咁緊張, 本來05年考嘅LLB final year因為05年頭要結婚而無考到, 結完婚又有左朱古力奶, 更加"的"唔起心肝去考, 一拖再拖, 04年上堂d嘢已經比返晒阿sir, 06年尾駭然發現已經差唔多3年啦, 無理由final year 先放棄, 咁頭果兩年d錢咪益晒london U??????

  一心諗住死就死啦, 唔再上一次04 年已經上過嘅堂, 淨係報3,4月嘅雞精班, 6月博一博啦!

考完之後, 都心中有數, 淨係上雞精班, 6月考試4月先開始讀, 又淨係讀雞精notes, 咩書都無睇過, 合格都偷笑囉!

  因為上一次考已經係04年嘅事, 之前明明每年8月21,22號左右就收到成績單, 今年到25/6號都仲係咩都無!  見其他forum已經有人鼓譟, 我呢d唔諗住再讀pcll就話等得姐, 人地報左pcll, 有conditional offer果d, 下個星期開學啦大佬!  見d網友日日打去狂揷考試局, 考試局就日日都話"倫敦果邊未寄過黎!"  本來我都唔係太緊張, 點知日日開信箱都空空如也, 一日驚過一日, 好驚唔合格出年又要再考過, 真係好攞命架大佬, 仲要比幾百英磅倫大賺, 真係諗起都"錶"冷汗!  再諗起我溫書果個月嘅非人生活, 朱古力奶成個月無街去, 喺屋企發毛, 就越諗越驚!!

好啦, 8月30號, 終於都收到成績單啦!  我心急到一路搭lift一路開個信封, 隻手仲震緊(真架, 無誇張架!!!),

一開..............................

我第一個反應梗係睇分啦, 睇完之後, 我即刻睇嘅係...我個名!  因為我第一個感覺係...張嘢唔係我嘅!!!!!

個名又真係我喎!  好囉, 一天都光晒囉, 竟然兩科嘅分係2-2, 一科係2-1!!!  2-1! 我之前果兩年從來未攞過架!  雖然拉勻只係得2-2, 但係比我預算嘅好好多啦!  好彩唔諗住報pcll, 因為2-2佢地實唔收!!!!!

其實以我呢d咁懶嘅人, 都可以合格, 真係全靠嶺南同poly(即係Malaysia 嘅kemaya and ATC派人過黎教)嘅preparation course, 我有d朋友都想讀LLB, 成日問我自修得唔得, 人地我就唔知, 我就一定唔得!  上堂同自修真係差好遠, 所以想讀嘅朋友, 一定要報preparation course!!!!! (好似賣廣告!!)

Milky X Hello Kitty

有日行過city super, 見到大大個牌寫住"狗狗雨褸6折", 一行埋去睇, 原來係我至愛嘅kitty喎!

  不過心諗, 一定無大狗size啦, d靚衫多數都無大size架啦!   點知比我摷幾摷, 搵到size 7呀!  莫講話size 7呀, 就算size 6 Milky都可能著到架, 因為Milky係小型金毛, 得果21kgs, 如果再減多1kg, 真係連考"豁免狗帶試"都慳返!!!!!  雖然6折之後都要成$190, 但係CoCo有件米老鼠雨褸, Milky無理由無架, 所以照買!!!

件衫其實有d長同鬆, 阿囡你唔通真係要著size 6?  邊有金毛咁細隻架??

朱古力奶嘅禮物-from契媽契爺

我地有契仔波仔同契女珠女, 朱古力奶梗係唔好執輸, 拿拿聲認埋波仔爸媽做契爺契媽先, 多d人錫, 無蝕底!

契媽去寵物展, 買左衫仔比朱古力奶, 好arm身好鬼型!  咁靚梗係要影相啦, 不過d相唔係好清楚, 原因係我要一隻手拎住零食, 一隻手拎相機, 仲要見到佢地個傻樣鬼咁無奈, 我又忍唔住笑, 所以張張都手震震!!!!!!!

 

我契女 - 珠女

星期日晚無落雨, 又唔係好熱, 所以就帶埋朱古力奶, 同埋我契仔一家, Zoe一家, 去左大尾篤食飯!  呢間嘢好好食架, d羊扒同意粉好正, 又可以比狗去, 真係一流!

繼我契仔-大埔喪波之後, 我又多左個契女啦!  佢之唔係就係波仔嘅細妹-珠女囉!!!!  佢係一隻奶茶色嘅toy poodle, 而家兩個月大, 好乖好嗲! 

至於我契仔波仔, 而家差唔多8個月大啦, 佢同CoCo一樣, 鬼咁死活潑, 好辛苦先捉到佢影張相架!

波仔同珠女, 一大一細, 好鬼可愛, 你地睇珠女個表情幾女仔!!!

禮拜六又整餅

星期六約左朱古力奶姨姨黎我屋企開爐整餅, 因為今次人手多左(我+姨姨+婆婆), 所以一係唔整, 一整就整夠兩款!  正所謂人多好辦事, 今次無論味道同賣相, 都好ok呀!

雜果忌廉蛋糕, 有士多啤利, 藍莓, 桃, 我地因為太貪心, 中間果層忌廉放左好多桃粒, 睇下幾厚!!!

 

至於呢個桃+藍莓甜餅, 我地未食過, 又係第一次整, 估唔到......好好好好食呀!  最重要係, 一d都唔難整, 切開細細件, 唔太甜, 一個字 - 正!

朱古力奶老豆0既生日蛋糕

星期日係朱古力奶老豆生日, 於是我星期六晚就開爐整士多啤梨藍莓蛋糕, 第一次整, 希望起碼都似個蛋糕啦!

  我今次係睇一本教整甜品嘅書, 再modify左少少, 好彩整出黎d味道都唔差喎, 又唔會太甜, 不過係d cream搽得唔係好靚, 下次試下唔好用即食cream, 自己打嘅應該會好d!

士多啤梨藍莓蛋糕

材料:

雞蛋              3隻

砂糖              90g

低筋麵粉     90g

無鹽牛油      60g

即食忌廉      1 支

士多啤梨      適量

藍莓              適量

 

事前準備:

1.  模具(18cm直徑的圓形蛋糕模)塗少許牛油, 放入冰箱冷卻

2.  焗爐預熱170度

3.  牛油隔熱水溶解

 

做法:

1.  蛋和砂糖用攪蛋器混合, 隔熱水再打發起泡  (我用煎pan煲左少少水, 熄左火之後將個碗浸入d熱水度繼續攪)

2.  蛋漿變成溫暖之後就拿離熱水, 繼續將材料打到變白色企身 (呢個步驟唔懶得, 一定要比d耐性打到企身, 如果唔係個蛋糕唔會鬆起架!)

3.  低筋麵粉篩入2. 的容器內, 大致攪拌混合

4.  加入溶解的牛油, 大致攪拌混合

5.  倒入蛋糕模內, 用170度焗爐焗30分鐘

6.  焗完後將蛋糕模倒轉放涼, 完全冷卻後即可取出

7.  將蛋糕上下切開一半 (即上面一層下面一層)

8.  士多啤梨切粒, 加入忌廉拌混, 塗在下層蛋糕面上, 再將上層蛋糕放回

9.  最後用忌廉, 原粒士多啤梨, 及藍莓做裝飾

 

 

喺蛋糕中間加層cream同士多啤梨粒, 除左好食d之外, 個樣都靚d!

 

食完蛋糕, 仲有餘興節目......CoCo獻禮!!!!!!

Dr. Milky@九龍塘護老院 + high tea

最近終於得閒返d, 可以同Dr. Milky去開工啦!  今次係Dr. Dog function, 去護老院探訪, 雖然今次有好多老人家都驚狗, 不過都有少數好鍾意狗, Dr. Milky表現都唔錯, 因為尋日先去完游水, 今日仲未回氣, 正所謂"a tired dog is a good dog"!!!

  今日仲有一隻朱古力lab一齊去探訪, 又係男仔, 又係叫CoCo, Milky對佢特別有興趣, 成日走去撩人地玩, 唔知係咪以為佢係阿哥呢???

探訪完之後, 就近近地去左九龍城Doghouse cafe食tea, 不過可能係假期, 好多人好多狗, 小狗又通通自由行, Milky又攰到死, 唔想同佢地玩, 情況有d混亂!!!

   我地叫左兩set 下午茶餐 - 芝士煙肉炒公仔麵 (人食嘅), 同埋一客南瓜蓉雞肉雜菜比Milky,  結果, 人食嘅就真係唔多好食, 反而Milky果d, 好似仲好食d!(我地自己試左味先比Milky食)

Dr. Milky返屋企途中, 已經喺我大脾度瞓到失去知覺!!!!!!